METE është e interesuar që fituesi të jetë
një kompani e fuqishme, me investime serioze, që t'i
shërbejë zhvillimit të Shqipërisë dhe
interesave të saj strategjike kombëtare. Për
këtë arsye, i kemi kërkuar Shërbimeve Sekrete
Shqiptare, si dhe ambasadave të disa vendeve mike dhe aleate
strategjike, që të na ndihmojnë me informacionet e
nevojshme.
Vetëm vitin e kaluar, kompania "ARMO" realizoi gati 10
milionë euro fitim neto, dhe për specialistë të
ekonomisë, ky është një bilanc në rritje. Por
dhe çmimet e tregut të brendshëm të karburanteve,
në rritje të vazhdueshme, ku "ARMO" zë 25% të
tregut, ndikuan në të ardhurat e kompanisë.
Julian Llupo
Privatizimi i ARMO-s dhe interesi strategjik i një
rëndësie të veçantë, kanë shtyrë
gjatë ditës së djeshme qeverinë që të
kërkojë informacione sekrete nga ana e Shërbimit
Informativ Kombëtar dhe ambasadave të aleatëve
strategjikë të Shqipërisë. Deklarata
është bërë gjatë ditës së djeshme
nga ana e zëvendësministrit të Ekonomisë, Neritan
Alibali. Gjatë ditës së sotme pritet që të
hapen ofertat e bëra nga kompanitë dhe investitorët
strategjikë, të interesuar për privatizimin e 85%
të aksioneve të kompanisë shtetërore, ARMO. "Ky
privatizim, është privatizimi më i madh strategjik i
bërë ndonjëherë në Shqipëri dhe për
ta bërë atë sa më të suksesshëm,
është përzgjedhur me tender ndërkombëtar
për konsulencë të procesit, një nga kompanitë
më të mëdha të kësaj fushe në botë,
kompania konsulente amerikane "Pattom Bogs", me të cilën
është punuar për hartimin e kuadrit ligjor dhe
procedurave të privatizimit. Falë punës së
konsulentit dhe specialistëve tanë, ky kuadër ligjor
është i një niveli të lartë
ndërkombëtar dhe garanton një proces të
drejtë, transparent dhe që i shërben interesave
kombëtare të vendit dhe programit të qeverisë
për privatizimet strategjike. Gjithashtu, ky kuadër ligjor, e
mbron procesin e privatizimit të ARMO-s nga të gjitha
defektet dhe dobësitë që janë evidentuar në
proceset e mëparshme",- tha Alibali. Vetëm vitin e kaluar,
kompania "ARMO" realizoi gati 10 milionë euro fitim neto, dhe
për specialistë të ekonomisë, ky është
një bilanc në rritje. Por dhe çmimet e tregut të
brendshëm të karburanteve, në rritje të
vazhdueshme, ku "ARMO" zë 25% të tregut, ndikuan në
të ardhurat e kompanisë. Rritja e çmimeve nga
operatorët privatë, është shoqëruar me
një rritje të moderuar nga kompania, duke ndikuar disi
në amortizimin e efektit të rritjes galopante të
çmimeve nga grosistët shqiptarë. "ARMO", sipas
burimeve nga kompania, ka tregtuar gjatë këtij viti gazoil me
çmimin deri në 95.11 lekë/litër. Por privatizimi
i kompanisë më të madhe në vend, duket se nuk do
të jetë i bazuar vetëm në kompaninë që do
të ofrojë më shumë në blerje, por, në
radhë të parë, në këtë tender duket se
janë përfshirë interesat e mëdha gjeopolitike
që ka vendi. "Duke marrë parasysh rëndësinë e
madhe strategjike të privatizimit të ARMO-s, në
Komisionin e Vlerësimit të Ofertave, ndryshe nga më
parë, janë përfshirë përfaqësues të
Ministrisë së Financave dhe të Ministrisë së
Drejtësisë në rang Zv/ministri, si dhe dy
përfaqësues të Kompanisë Konsulente amerikane
"Pattom Bogs", të cilët janë anëtarë të
Komisionit me të drejta të plota. Gjithashtu, pas
përfundimit të vlerësimit të ofertave, çdo
kandidat ka të drejtën e apelimit të vlerësimit tek
Ministri i Ekonomisë, i cili brenda 10 ditëve shqyrton
ankesën dhe kthen përgjigje. Për ta bërë
procesin sa më të mbrojtur nga çdo shkelje apo
padrejtësi, Këshilli i Ministrave ka të drejtë
ligjore që, në çdo kohë, para shpalljes së
fituesit, të anulojë procedurën e tenderimit", - tha
Alibali. Por zv/ministri i Ekonomisë ka bërë të
ditur se gjatë ditëve të fundit janë rritur në
maksimum presionet lobiste në drejtim të privatizimit të
ARMO-s. "Dua t'ju garantoj që Qeveria dhe METE, nuk influencohen
aspak prej tyre dhe akuzave të hedhura në opinionin publik.
Por do të dëshironim që forca të ndryshme politike,
për asnjë arsye, të mos përfshiheshin në
presione të tilla, të cilat do ta dëmtonin procesin e
privatizimit", - tha Alibali. Duke theksuar në deklaratën e
tij për shtyp, interesin e madh kombëtar dhe strategjik
të këtij privatizimi, numri dy i Ministrisë së
Ekonomisë ka kërkuar ndihmë të specializuar dhe
informacione sekrete për kompanitë që marrin pjesë
në këtë tender. "Privatizimi i ARMO-s është
një interes i madh kombëtar. Duke e vlerësuar si të
tillë, METE është e interesuar që fituesi të
jetë një kompani e fuqishme, me investime serioze, që
t'i shërbejë zhvillimit të Shqipërisë dhe
interesave të saj strategjike kombëtare. Për
këtë arsye, i kemi kërkuar Shërbimeve Sekrete
Shqiptare, si dhe ambasadave të disa vendeve mike dhe aleate
strategjike, që të na ndihmojnë me informacionet e
nevojshme. Nga ana tjetër, vëzhgimi dhe ndjekja me kujdes
prej tyre e këtij procesi privatizimi, është një
garanci më tepër për transparencën dhe
ligjshmërinë e privatizimit të Kompanisë ARMO", -
tha Alibali.
+++
Ambasada Amerikane në Tiranë kërkoi që të ndiqet një procedurë transparente nga qeveria
Privatizimi, rusët dhe amerikanët konkurrentë
Konsulenti "Pattom Bogs" i ka bërë të ditur
Ministrisë së Ekonomisë dhe Energjitikës, se
pavarësisht se në shumë raporte të bëra
publike edhe nga media, çmimi i privatizimit llogaritet në
rreth 100 milionë dollarë, ose më shumë, kompania
mund të mos arrijë këtë vlerë në shitje.
Madje, në raportin e bërë nga ana e kompanisë
konsulente amerikane "Pattom Bogs" sqarohet se një çmim
prej 100 milionë dollarësh i dhënë publikisht,
është spekulim.
Privatizimi i kompanisë "ARMO" e ka vendosur qeverinë
shqiptare, për herë të parë, para një
zgjedhjeje që ka bërë në mënyrë të
drejtpërdrejtë me interesat gjeostrategjike të vendit.
Në këtë privatizim kanë shfaqur interesat e tyre
kompani të mëdha që i përkasin dy superfuqive
të energjisë, Shteteve të Bashkuara të
Amerikës dhe Rusisë.
Privatizimi i kompanisë ARMO ka vendosur qeverinë
shqiptare, për herë të parë, para një
zgjedhjeje që ka bërë në mënyrë të
drejtpërdrejtë me interesat gjeostrategjike të vendit.
Në këtë privatizim kanë shfaqur interesat e tyre
kompani të mëdha që i përkasin dy superfuqive
të energjisë, Shteteve të Bashkuara të
Amerikës dhe Rusisë. Kompania amerikane "Refinery Association
of Texas INC" është një nga ofertuesit në
këtë tender. Përfaqësues të kësaj
kompanie kanë takuar edhe kryeministrin Berisha në muajin
mars të këtij viti, duke shfaqur interesin e tyre për
të blerë kompaninë shqiptare të naftës, ARMO.
Kompania njihet si një nga kontraktorët më të
mëdhenj të qeverisë amerikane, njëkohësisht
edhe për kontratat e shumta të lidhura edhe me qeveri të
tjera, në të gjithë botën, në fushën e
furnizimit me naftë të ushtrisë. Kompani tjetër
në këtë garë, që po flitet në media si
konkurrente e amerikanëve, është "Penta Investments".
Kompania i përket një grupi financiar çekosllovak dhe
ka interesa të ngushta në Europën Juglindore. Kompania
merret kryesisht me blerje dhe shitje kapitalesh në treg. Në
rastin konkret, blerja e kompanisë ARMO mund të jetë
qëllimi i një shitjeje të saj sërish në treg,
në drejtim të investitorëve strategjikë.
***
Por një nga pikat e rëndësishme të këtij
privatizimi mbetet edhe çmimi i shitjes. Në raportin e saj
të vlerësimit për kompaninë "ARMO", konsulenti
"Pattom Bogs" i ka bërë të ditur Ministrisë së
Ekonomisë dhe Energjitikës, se pavarësisht se në
shumë raporte të bëra publike edhe nga media,
çmimi i privatizimit llogaritet në rreth 100 milionë
dollarë, ose më shumë, kompania mund të mos
arrijë këtë vlerë në shitje. Madje, në
raportin e bërë nga ana e kompanisë konsulente amerikane
"Pattom Bogs" sqarohet se një çmim prej 100 milionë
dollarësh i dhënë publikisht, është spekulim.
Por shifra e dhënë për shitjen e kësaj kompanie ka
qenë nga vetë "ARMO" dhe Ministria e Ekonomisë, me rreth
170 milionë dollarë, ose 110 milionë euro. Kjo nuk
është hera e parë, që në privatizimet
strategjike ndodhin përplasje midis vlerësimit të
konsulentëve të huaj dhe çmimeve të kërkuara
nga ana e qeverisë shqiptare. Vetëm disa ditë më
parë ka qenë Ambasada Amerikanë në Tiranë
që ka lëshuar një deklaratë publike në drejtim
të qeverisë, për këtë privatizim strategjik.
Ambasada Amerikane në Tiranë i bëri thirrje
qeverisë shqiptare që të ndjekë një
procedurë transparente dhe të hapur për privatizimin e
kompanisë shtetërore të naftës, "ARMO". "Ne po e
ndjekim privatizimin (e ARMO-s) nga afër dhe presim që
qeveria e Shqipërisë ta kryejë atë në
mënyrë transparente dhe të hapur, duke siguruar një
fushë të njëtrajtshme loje, për të gjitha
palët e interesuara",- u shpreh zyra e shtypit e Ambasadës
së SHBA-së në Tiranë.
(Burimi: Gazeta Shekulli)
