Një Maradonë i tillë nuk shihej prej
shumë kohësh. Mos mendoni se "El Pide d'Oro" është
kthyer në fushën e lojës dhe e ka mahnitur stadiumin me
numrat e tij prej "xhokoljeri", që në të kaluarën e
kanë bërë futbollistim më të mirë të
të gjitha kohërave. Gjithashtu, mos mendoni ta shihni në
gjendje të tmerrshme, për shkak të sëmundjeve dhe
abuzimit me drogën. Eshtë një Maradonë në stil
modeli, që luan rolin e një tifozi të çmendur, ai
që u shfaq në tribunën e "Bombonerës" së
Buenos Airesit, për të parë Bokën e tij të
dashur. Ai e ka bërë edhe herë të tjera
diçka të tillë, por tani është ndryshe.
Ndryshe, do të thotë më i dobët e më elegant.
DIETA - Nuk e dimë nëse Diego ka
ndjekur ndonjë dietë të vetën, duke hequr dorë
nga pijet alkoolike, ato me gaz, ëmbëlsirat dhe yndyrnat. Nuk
e dimë nëse argjentinasi i është besuar një
dietologu të rreptë, i cili ia ka bërë të
qartë se trupi i tij nuk do ta kishte të gjatë, pa
një ushqim të kualifikuar. Ajo që dimë
është se Maradona, i parë në fitoren 3-0 të
Boka Zhuniorsit ndaj venezuelianëve të Marakaibos,
është njeri i paraqitshëm e që nuk ndruhet ta
tregojë. Një fizik i tillë i gëzon
simpatizantët e shumtë të Diegos, të cilët,
në një të kaluar jo shumë të largët,
kanë menduar se nuk do ta shihnin më në jetë.
FAMILJA - Maradona mbërriti në
stadium i shoqëruar nga ish-bashkëshortja e tij Klaudia dhe
vajza Dalmita; kjo e fundit shumë tifoze me Bokën. Ishte
një moment i lumtur, në një jetë të mbushur
plot me episode të këqija dhe çaste të
rrezikshme. Një jetë që nuk ka qenë
asnjëherë e mëshirshme me kampionin, që u bë
"hero" në Napoli. Pikërisht këto ditë,
Maradonës i duhet të zgjidhë edhe çështjen
gjyqësore me ish-menaxherin dhe mikun e tij Guilermo Kopola, me
atë me të cilin ka qenë më shumë i lidhur
në pjesën e lavidshme të karrierës së tij.
SHKAKU - Kampioni e ka hedhur në gjyq
menaxherin për mënyrën sesi u mbyll
marrëdhënia, në lidhje me reklamat. Kopola i ka
paraqitur gjykatës një seri dokumentesh që tregojnë
se ai ka hequr dorë nga të gjitha aktet ligjore, që
kishte marrë përsipër mbi Maradonën, duke ia
dorëzuar të gjitha kompetencat ish-gruas së tij, Klaudia
Vilafane. Kopola këmbëngul me vendosmëri se nuk ka
më borxhe për t'u shlyer, mes tij dhe Maradonës.
Ergi LUBANI
Ervin Kuman, trajneri i ri i Hungarisë
Federata Hungareze e Futbollit bëri të ditur dje se
ka caktuar ish-mesfushorin e Holandës, Ervin Kuman, si trajnerin e
ri të përfaqësueses. 46-vjeçari Kuman, që do
të fillojë detyrën që nga 1 maji, do të
marrë vendin e Pitet Varhidit, i cili u emërua në
dhjetor të 2006-s, por dështoi në kualifikimin për
në europian. Ervini, vëllai i madh i ish-mbrojtësit
të Barcelonës, Ronald Kuman, e filloi karrierën si
trajner te RKC Valvijku në vitin 2004. Më pas ai kaloi te
Fejënordi, por që dha dorëheqjen në maj të
vitit të kaluar. Hungaria është në të
njëjtin grup eliminator me Shqipërinë, Portugalinë,
Suedinë, Danimarkën dhe Maltën. Vetëm një
"mrekulli" do t'i kualifikonte hungarezët për në
Kupën e Botës 2010.
Burimi: Gazeta Shekulli
