Vllaznia nderon edhe Bashkinë e Shkodrës

Mbrëmjen e së shtunës, në ambientet e hotel "Colosseu" t, u zhvillua asambleja e radhës e klubit të futbollit "Vllaznia". Ai që ka folur më shumë nga të gjithë në këtë asamble ka qenë sigurisht presidenti i klubit Valter Fushaj. Kjo ishte normale, pasi ka pasur për çfarë të flasë, duke nisur nga strategjia që është duke hartuar klubi në lidhje me të ardhmen e tij, duke e bazuar punën edhe tek investimet në ekipet e moshave, për të vazhduar me perspektivën e klubit për të kaluar drejt privatizimit dhe më pas edhe për gjëra të tjera. Lajmi më i mirë sigurisht që ishte rikonfirmimi i presidencës aktuale dhe i kryesisë së klubit, ku bëjnë pjesë emra të nderuar, si V.Fushaj, R.Rasha, P.Fushaj, A.Haxhi, H.Zmijani, A.Çela, Xh.Amuli, A.Bushati dhe A.Haxhi. Një rikonfirmim i tillë sigurisht që ishte një lajm i mirë, por mbi të gjitha edhe një përgjegjësi më e madhe për ta. Vetë presidenti Fushaj theksoi se të gjithë duhet të japin një kontribut, në mënyrë që Vllaznia të ngjitet aty ku duhet. Kuptohet që pikësynimi ka qenë vënia para përgjegjësisë edhe e pushtetit lokal, i cili është duke qëndruar shumë larg sportit në përgjithësi dhe futbollit në veçanti. "Kemi bërë disa kërkesa në bashki për trefishimin e fondeve për futbollin, por nëse kjo nuk miratohet, të paktën të na sigurohet ndonjë fushë për stërvitje, të rregullohen ambientet përreth stadiumit dhe gjëra të tjera.
 
Të gjithë duhet ta kenë të qartë se, nëse bëhet një investim, ky nuk është për mua si Valter. Eshtë një investim që i mbetet Vllaznisë, Shkodrës, dhe prandaj nuk duhet të kursejmë ndihmën që mund të japë secili për futbollin shkodran," ka thënë ai. Një pikë tjetër që është diskutuar jo pak ka qenë dhe kalimi në shoqëri aksionere. Të gjithë kanë qenë dakord me një pikë të tillë dhe si rrjedhojë është miratuar unanimisht një propozim i tillë dhe tashmë do të nisin procedurat për të provuar kalimin në një stad të tillë. Megjithatë, të gjithë e kanë pasur mendjen te gjendja aktuale, sepse deri në kalimin drejt aksioneres do të duhet edhe shumë kohë. Pjesëtarët e asamblesë janë shfaqur jo pak të irrituar me indiferencën e bashkisë ndaj futbollit, teksa kanë përmenduar bashki të ndryshme në vend, të cilat jo vetëm japin më shumë para për futbollin, por janë në krahun e djathtë të presidentëve të klubeve. "Pushteti lokal duhet të jetë më aktiv, sepse futbolli është një pjesë e rëndësishme e jetës së këtij qyteti. Nëse kalojmë pastaj në shoqëri aksionere, atëherë është punë tjetër, sepse shkojmë drejt privatizimit, por edhe atëherë bashkia do të jetë e interesuar, sepse do jetë pjesë e asaj shoqërie me asetet dhe përqindjen e saj. Pra të gjithë duhet të punojmë të kalojmë nga ky stad në një stad më të lartë, sepse vetëm kështu edhe futbolli do të shkojë më përpara," ka thënë presidenti Fushaj në fjalën e tij.