Dhëmbi optimist: Do ta parakalojmë Dinamon

Paulin Dhëmbi është një nga shtyllat e skuadrës së Partizanit, pasi përvoja e tij është më e madhe se e një pjese të mirë të të kuqve. Në gjirin e Partizanit ka një mbipopullim të lojtarëve me moshë të re, kështu që 28-vjeçarit Dhëmbi i bie, që, përveç kontributit të tij, të orientojë edhe më të rinjtë. Këtë gjë korçari e bëri edhe në takimin miqësor të së shtunës me Erzenin. Për 90 minuta Dhëmbi ishte i detyruar që të luante në mbrojtje, pasi reparti difensiv është goditur nga një valë dëmtimesh (kapiteni Beqiri si dhe Osmani me Tafajn). Paulin Dhëmbi dhe pesë lojtarë të tjerë të Partizanit ishin të pranishëm në "zborin" dhjetëditor të kombëtares dhe shpresojnë se emrat e tyre do të jenë edhe në grumbullimet e tjera të kuqezinjëve. "Përfshirja ime si dhe e disa shokëve të skuadrës, në grumbullimin e kandidatëve të kombëtares, ishte një gjë pozitive, megjithëse ishte një kohë e shkurtër. Shpresoj se ky grumbullim do të na shërbejë, por, megjithatë ngelet për të parë, nëse trajneri i ri i kombëtares do të jetë i gatshëm që të na ndjekë në javët në vazhdim. Ndërsa, përsa i përket të ardhmes, se a do të jemë apo jo në grumbullimet e tjera, nuk mund të flas për këtë gjë, pasi kjo u përket drejtuesve të ekipit kombëtar," ka deklaruar për "Sportin shqiptar" mesfushori i Partizanit, Paulin Dhëmbi. Në kohën që Partizani do të kryente pjesën më me ngarkesë të minifazës përgatitore të janarit, trajneri nuk kishte nën urdhrat e tij, Dhëmbin, Shkëmbin, Abilaliajn, Bakajn, Muzakën dhe Osmanin që ishin thirrur nga stafi i kombëtares.
 
Mesfushori korçar e konsideron si një eksperiencë pozitive pjesëmarrjen në "zborin" kuqezi, por është i vetëdijshëm se copëtimi i organikës së Partizanit nuk i ka shërbyer skuadrës. Megjithatë, mesfushori i kuq e shikon Partizanin në rrugën e duhur për të fituar trofe, pasi diferencën me Dinamon e shikon mëse të rikuperueshme. "Fazë përgatitore kemi bërë si ne që ishim të përfshirë në "zborin" kuqezi, por edhe pjesa tjetër e skuadrës. E mira do të ishte që kjo fazë e ndërmjetme përgatitore ta gjente të bashkuar Partizanin, pasi është ndryshe kur përgatitet i gjithë grupi, sesa të ndarë në dy pjesë. Kjo ndarje nuk është shenjë pozitive për ekipin, pavarësisht se, për ne që ishim të grumbulluar nga trajneri i ri i kombëtares, ishte e vlefshme për të lënë përshtypjet e para te stafi kuqezi. Rruga për të përfunduar kampionati është e gjatë, pasi ka plot ndeshje në dispozicion të të gjitha skuadrave. Kështu që diferencën me Dinamon, që është gjashtë pikë, e shikoj të rikuperueshme. Pra besoj se jemi në ritmin e duhur për të vazhduar luftën për fitimin e titullit," ka përfunduar mesfushori i Partizanit, Paulin Dhëmbi.