Spiunët e Sigurimit, PDK: Kuvendi të hapë dosjet

Demokristianët kërkojnë që Kuvendi të vihet në lëvizje dhe të fusë në procedurat parlamentare, draftin që ata kanë depozituar prej kohësh, lidhur me hapjen e dosjeve për ish-bashkëpunëtorët e Sigurimit të Shtetit. "Ne kemi depozituar, prej dy vitesh, një ligj në Parlament, ku kërkohet hapja e dosjeve për ish-bashkëpunëtorët e Sigurimit të Shtetit dhe largimin e tyre nga politika aktive. Shqipëria është vendi i fundit në Europën Lindore që ende nuk e ka kryer këtë proces, për pasojë, dosjet e errëta të Sigurimit dhe Policisë Sekrete po mbajnë peng zhvillimet demokratike dhe moralin e ecjes së shoqërisë përpara. Janë pikërisht individët dhe segmentet e lidhura me ish-Sigurimin e Shtetit, ata që mbajnë qëndrimet më të ashpra politike kundër çdo mendimi europian, qytetar dhe progresiv në politikën shqiptare dhe që bëjnë pjesë në grupet politike më aktive kundër PDK-së dhe forcave të vërteta europiane e demokratike në Shqipëri",- tha dje kryetari i grupit parlamentar i PDK-së, Ndue Shpani. Në fakt, nëse do t'i referoheshim pikërisht axhendës së publikuar nga Kuvendi, drafti për hapjen e dosjeve duhet të kishte kaluar me kohë për diskutim në komisionet parlamentare. Pikërisht, për këtë çështje, Kuvendi duhet të merrte në shqyrtim projektligjin "Për pastërtinë e figurave të zyrtarëve të lartë të administratës dhe të të zgjedhurve", paraqitur nga grupi parlamentar i PD-së, projektligjin "Për verifikimin e të qenit bashkëpunëtor i Shërbimeve Sekrete Shqiptare para datës 31.12.1992, të funksionarëve të lartë publikë", paraqitur nga grupi parlamentar i PS-së, si dhe projektligjin tjetër "Për kontrollin e figurës së personit zyrtar të zgjedhur apo emëruar në organet e rëndësishme të shtetit", si nismë e deputetit Nard Ndoka. Sipas draftit të PDK-së, ish-spiunët do të kenë mundësinë të kandidojnë për deputetë dhe në njësitë e qeverisjes vendore, por ndalohen që të zgjidhen në postet drejtuese të Shtetit Shqiptar.