Dita e punëtorëve, Berisha shkurton 600 vende pune

Si për ironi të fatit, qeveria "Berisha" më 1 Maj, ditën e punëtorëve vendos të shkurtojë numrin e punonjësve buxhetor. Bëhet fjalë për shkurtimin e afro 600 vendeve pune në organikën e dy ministrive, të Arsimit dhe asaj të Punëve Publike dhe Transporteve. Për të ruajtur kontrollin e shpenzimeve buxhetore të personelit dhe për t'i paraprirë hartimit të një buxheti më të vogël për vitin 2009, Ministria e Financave i ka propozuar qeverisë shkurtimin e numrit të punonjësve nga 104716 në 104105 punonjës. Konkretisht në Ministrinë e Punëve Publike, Transportit dhe Telekomunikacionit organika pakësohet me 135 punonjës. Ky shkurtim sipas relacionit shoqërues të vendimit të qeverisë ka ardhur si rrjedhojë e shkrirjes së Policisë së Ndërtimit, e cila kishte 275 punonjës dhe e krijimit të Inspektoriatit të Ndërtimit me 140 punonjës. Pas këtyre shkurtimeve numri total i punonjësve në këtë ministri dhe strukturat qeveritare që varen prej saj bëhet 1362 punonjës. Por ndaj këtij vendimi ka reaguar Ministria e Transporteve, e cila me anë të titullarit të saj, Sokol Olldashi, ka kërkuar që numri i shkurtimeve të jetë 13 veta më pak, pra 122. Sipas lëndës shoqëruese të këtij projektvendimi, Olldashi i kërkon ministrit të Financave, Ridvan Bode, që të rishikojë vendimin e marrë, për shkak të pamundësisë së kësaj ministrie për të përballuar aktivitetin e punëve operative.

Një reformë më e thellë në organikë pëson Ministria e Arsimit, e cila për gjysmën e vitit 2008 parashikohet që të shkurtojë organikën e saj totale me 487 punonjës. Ky pakësim vjen si rezultat i reflektimit të vendimit të Këshillit të Ministrave "Për administrimin e konvikteve të sistemit arsimor parauniversitar", vendim që parashikon që punonjësit e administrimit të konvikteve të kalojnë në varësi të pushtetit lokal. Ndërkohë që qeveria ka parashikuar dhe një shtesë prej 11 vende pune në Ministrinë Ekonomisë dhe Energjitikës. Kjo ka ardhur si nevojë e krijimit të njësisë së mbikëqyrjes së lojërave të fatit, si një strukturë e re në varësi të Ministrisë së Ekonomisë. Meqenëse numri aktual i Ministrisë së Ekonomisë nuk mund të përballojë edhe fluksin e punës së kësaj njësie, Ministria e Financave ka dhënë lejen për shtimin e numrit total të punonjësve në 508. Për të gjitha reduktimet dhe shtimet e numrit të punonjësve Ministria e Financave ka bërë dhe rishikimet respektive në buxhetin e shtetit. Pavarësisht shkurtimeve, Ministria e Arsimit vazhdon të ketë numrin më të madh të punonjësve, plot 43707 punonjës. Pas saj vijnë: Ministria e Shëndetësisë me 15408 punonjës, ajo e Brendshme me 13065 punonjës, e Mbrojtjes me 11800 dhe Ministria e Drejtësisë me 4594 punonjës.

 

TIRANË- Qeveria "zgjidh qesen" për punonjësit e institucioneve të pavarura kushtetuese. Me propozim të Ministrisë së Financave dhe asaj të Brendshme, Këshilli i Ministrave ka miratuar dje vendimin "Për një ndryshim në ligjin për pagat dhe shpërblimet e institucioneve të pavarura kushtetuese". Ndryshimi prek vetëm Inspektoriatin e Lartë të Deklarimit dhe Kontrollit të Pasurive, ku disa kategori punonjësish marrin një shtesë rroge prej 10 mijë lekësh të reja në muaj. Konkretisht nëpunësit në pozicionet "Inspektor i lartë" dhe "Ndihmës inspektor i lartë" për shkak të vështirësisë së punës ndryshojnë kategorinë e pagës, duke kaluar një shkallë më lart. Inspektori i Lartë kalon nga kategoria 2b në kategorinë 2a, ndërsa ndihmësinspektori i lartë kalon nga kategoria 3a në kategorinë 2b dhe për rrjedhojë përfitojnë një shtesë page me 10 mijë lekë.

Në muajin dhjetor 2007 qeveria miratoi vendimin për pagat për nëpunësit civilë të kabineteve dhe punonjësit mbështetës të institucioneve të pavarura. Bazuar në legjislacionin në fuqi, kategoritë e pagave për këta nëpunës u përcaktuan duke iu referuar ministrive të linjës, si dhe në përputhje me përshkrimet e punës së pozicioneve. Por pas miratimit të vendimit të dhjetorit, ILDKP-ja kërkoi rishikim të vendimit për dy emërtesat e sipërcituara. Duke e konsideruar si të një rëndësie të veçantë punën e këtyre inspektorëve, dy ministritë e linjës vendosën që të propozojnë ndryshimin e mësipërm. Ndërkohë që efektet financiare parashikohet të fillojnë që nga data 1 janar 2008.