Kryetari i Partisë Socialiste, Edi Rama ka gjetur pikërisht
Sarandën, zonën zgjedhore të paraardhësit të
tij në parti, Fatos Nano, për të mbyllur dialogun e tij
me shqiptarët për çështjet sociale. Në
të gjitha takimet që ka zhvilluar Rama në Sarandë,
Delvinë, në komunën Bakaj dhe në Ksamil, i ka ftuar
të gjithë, pa dallime partiake apo bindje politike, të
jenë pjesë e kontributit që duhet të japin të
gjithë shqiptarët për programin e ri socialist. Kjo
alternativë e re, është shprehur Rama në këto
takime, do të formësohet nga të gjitha tryezat e
Partisë Socialiste, në çdo fshat e qytet, për
të bërë të mundur që programi i nesërm
t'i përgjigjet të gjitha problematikave të zhvillimit
të zonave dhe specifikave të tyre ekonomike e sociale.
Gjatë fjalës së tij, duke vënë në dukje
masakrën urbane dhe atë mjedisore që shoqëron
zhvillimin e bregut të detit të Sarandës, shefi i
selisë rozë nuk ka ngurruar që të sulmojë
në mënyrë direkte atë që ai e konsideroi si
politikë e vjetër, e cila, sipas tij, falë lojërave
politike, ka mbajtur dhe po mban peng zhvillimin e kësaj zone. Pa
folur me emra konkretë Rama ka theksuar se, është
pikërisht kjo politikë e vjetër ajo që u ka
premtuar shqiptarëve gjithçka, dhe në realitet nuk u
ka dhënë asgjë. Për këtë arsye, ai u ka
bërë thirrje sarandiotëve që të bashkohen
për t'i dhënë fund kësaj gjendjeje dhe për
të krijuar kushtet për të ndërtuar një
Shqipëri evropiane. "Në rast se ne i japim jetë një
bashkimi të ri, përtej kufijve të vjetër të
partive, përtej mureve të lidhura nga një politikë
e vjetër, e cila i ka ushqyer tradhtitë, e cila ka jetuar dhe
jeton me tradhtitë, e cila falë tradhtive është
në gjendje që të sundojë më lehtë
shqiptarët, ne do të mund që të nxjerrim vendin nga
ky ngërç 17-vjeçar. Një politikë e
vjetër e cila u ka premtuar shqiptarëve gjithçka dhe u
ka dhënë asgjë. Një politikë e vjetër, e
cila ka ngritur tek shqiptarët gjithfarë muresh dhe pengesash
dhe lehtësisht i ka sunduar ata duke bërë që
një pakicë gjithmonë e më e vogël të
pasurohet përditë e më shumë dhe një
shumicë gjithmonë e më e madhe, të varfërohet
përditë e më shumë",- ka theksuar kryesocialisti
Edi Rama. Gjithashtu ai ka vënë theksin se këto zona
edhe pse kanë pasuri natyrore dhe mundësi zhvillimi,
përsëri janë të varfra dhe punësimi mungon,
zhvillimi është krejt informal dhe i pa orientuar. Prandaj,
Rama ka bërë thirrje që t'i jepet fund këtij lloj
zhvillimi, në mënyrë që të garantohet
mirëqenia dhe arritja e standardeve evropiane, si në
turizëm por edhe në aspektet e tjera. Duke vizituar edhe
të paktat investime të këtyre zonave, kryetari socialist
është shprehur për një mbështetje të
të gjithë sipërmarrësve, në mënyrë
që përmes tyre të garantohet edhe rritja e
punësimit dhe frenimi i emigracionit, i cili e ka lënë
Jugun e vendit të shkretë nga rinia e tij. "Është e
domosdoshme që të krijojmë kushtet për t'ju
dhënë një të ardhme fëmijëve tanë,
për t'ju dhënë një të ardhme atyre që
duan ta ndërtojnë jetën e tyre në këtë
vend, gjithë atyre që duan të arratisen nga vendlindja e
tyre, qoftë kjo në qytet apo në fshat",- ka pohuar
kryesocialisti Edi Rama.
