Presidenti i Republikës, Bamir Topi përfundoi dje
vizitën treditore në Kosovë. Dita e tretë të
vizitës zyrtare e ka nisur me një vizitë në qytetin
historik të Prizrenit. I shoqëruar nga zv.kryeministri
Gazmend Oketa dhe delegacioni i lartë nga Shqipëria,
presidenti Topi është pritur nga Kryetari i Komunës,
Ramadan Muja dhe shumë qytetarë të mbledhur përpara
Kompleksit të Lidhjes së Prizrenit, në pritje të
mbërritjes së Kryetarit të Shtetit. Pasi është
përshëndetur me qytetarët, presidenti Topi
është shprehur i emocionuar nga mikpritja e prizrenasve.
"Unë ndihem i nderuar, i respektuar, njëkohësisht edhe i
emocionuar që jam këtu në Prizren, në një
qytet tradicional historik, që në momentet më të
rëndësishme për fatet e Shqipërisë, ka
dhënë jo vetëm fijen e shpresës, por ka
frymëzuar të gjitha shoqërinë shqiptare për
t'u rigjallëruar, për t'u bashkuar dhe për t'i
bërë ballë atij represioni që vinte nga qarqet e
errëta.
Sot jemi në një situatë
tjetër kur të gjithë duhet të gëzohemi, sepse
gjithë këto përpjekje madhore të shqiptarëve
në dekada po kurorëzohen dhe jemi në pragun e shpalljes
së pavarësisë së Kosovës, që
është një lapidari i ri i përpjekjeve, por edhe i
kurorëzimit me sukses të këtyre përpjekjeve".
Më pas, presidenti Topi ka vizituar rezidencën e
qeverisë së Lidhjes Shqiptare të Prizrenit, ku ka
parë dokumentet origjinale të shpëtuara nga
shkatërrimi që iu bë muzeut nga serbët, në 27
mars 1999, që rrëfejnë historinë e Lidhjes në
themelimin e saj, në qershor të vitit 1878. Presidenti i
Republikës, Bamir Topi, së bashku me Zonjën e Parë
Teuta Topi, ka bërë një vizitë ngushëllimi dhe
nderimi në shtëpinë e ish-Presidentit të
Kosovës në Velani, Ibrahim Rugova, ku është pritur
nga bashkëshortja, fëmijët dhe familjarët e tij.
Kreu i shtetit shqiptar, me anë të kësaj vizite në
përvjetorin e dytë të ndarjes nga jeta të Doktor
Rugovës, ka nderuar dhe vlerësuar veprën dhe rolin
historik të udhëheqësit të Kosovës.
